Проф. д-р Габриела
Ќурчиева-Чучкова

Почитувани колеги,
Драги пријатели,

Ми претставува огромно задоволство да Ве поканам на 5 Конгрес на Здружението на специјалисти по ортодонција со меѓународно учество, кој ќе се одржи од 26 до 29 септември во нашиот бисер, преубавиот древен Охрид, градот под Самоиловите кули, градот на 365 цркви, градот во кој твореа и едуцираа Светите Климент и Наум, учениците на Светите Кирил и Методиј.

Воедно ве покануваме да заедно го прославиме двојниот јубилеј.

И не случајно го одбравме и градот и хотелот за одржување на конгресот. Токму на ова исто место, Охрид, хотел Гранит, пред 15 години беше одржан Првиот конгрес на Здружението на специјалисти по ортодонција со меѓународно учество, кој остави неизбришливи траги, и се уште го паметат бројните учесници.

Од тогаш започна една многу успешна приказна за која сонуваа и упорно работеа мала група млади ентузијасти. И сонот стана јаве. До ден денешен се уште ентузијастички продолжуваат со истото темпо, за да го одржат респектното ниво.

Во текот на четирите дена на Конгресот ќе проследите презентации поврзани со темата на конгресот “Извонредност во ортодонцијата – преку дијагностика, техника, резултати и етичност“. Во нив, веруваме, ќе најдете одговори на многу ваши прашања и дилеми со кои се соочувате во секојдневната клиничка пракса, но и од научен аспект, ќе ги осознаете достигнувањата во нашата професија.

Посебно задоволство ќе ни претставува да меѓу учесниците видиме голем број млади луѓе кои ќе имаат можност да ги слушнат најновите достигнувања во нашата ценета професија од еминентните поканети предавачи. Веруваме, истовремено ќе биде силен мотив за активно учество во активностите на Здружението, како ова реалност би продолжила понатаму, уште појака и побројна.

Покрај научната програма, подготвиме програма која вклучува посета на културни споменици, забава, дружење, уживање во домашната кујна, кои очекуваме дека ќе го направат вашиот престој во Охрид навистина незаборавен!

Срдечно,
Проф. д-р Габриела Ќурчиева Чучкова
Претседател на 5 Конгрес на Здружението на специјалисти по ортодонција со меѓународно учество